ILOILO – Gindayaw ni Iloilo Police Provincial Office Director Police Col. Roland Vilela ang performance sang tanan nga pulis sa pagdakop sa mga wanted person sa probinsya sang Iloilo.
Ini ang kasunod sang mandu ni Vilela sa tanan nga police personnel nga dakpon ang 80 ka wanted persons sa sulod sang 24 oras.
Santo sa record sang Iloilo Police Provincial Office as of September 6, 2019, naglab-ot sa 73 ang nadakpan nga wanted person ukon ang mga may yara sang kaso.
Sa interview sang Bombo Radyo kay Vilela, iya ginpahayag nga nalipay siya sa nangin accomplishment sang tagsa ka police station.
Suno kay Vilela, iya man nga nahangpan nga indi tanan nga banwa ang may yara sang wanted person rason nga ang iban sa mga chief of police ang wala sang accomplishment.
Tuhoy naman sa pamangkot kun ano nga silot ang igahatag sa mga chief of police nga wala sang accomplishment, ginpahayag ni Vilela nga wala sang igahatag nga silot sa mga non-compliant.
Ini bangud nga suno sa Iloilo Police Provincial Office Director, ang nasambit nga mandu ang isa lamang ka challenge ukon pagpanghangkat sa tanan nga pulis sa probinsya sang Iloilo.
Santo sa summary sang accomplishment report, naglab-ot sa 46 ang nadakpan nga wanted person, 4 ang nadakpan nga may kaso nga illegal drugs, 2 ang nadakpan bangud sa paghupot sang indi lisensyado nga armas-luthang, 3 ang nadakpan sa illegal fishing, 4 ang nadakpan bangud sa illegal quarry kag 14 naman ka armas ang gin turn-over.
