ILOILO – Gin-athag sang Iloilo Police Provincial Office nga ginahimo lamang sang mga ini ang katungdanan sa imbestigasyon sa pagluthang sang ex-convict sa banwa sang Leganes.
Kun balikan, Marso 26, maswerte nga wala napatay ang biktima nga si Glen Paloma, residente sang Barangay Zamora-Melliza, Iloilo City Proper nga ginhal-id sa talamnan sa Barangay Calaboa, Leganes.
Samtang, nalakip sanday Police Executive Master Sergeant Jessie Jim Rubio kag Police Staff Sergeant Enrico Carlito Gonzales sa anum ka mga suspects nga ginpasakaan sang kaso sang Iloilo Police Provincial Office nga gintudlo ni Paloma nga nagluthang sa iya.
Sa interview sang Bombo Radyo kay Police Colonel Ronaldo Palomo, director sang Iloilo Police Provincial Office, iya ginpahayag nga wala ini sang may ginapaboran sa tunga sang duha ka bahin.
Sa matuod suno kay Palomo, nangin maid-id ang imbestigasyon sang Leganes Municipal Police Station natuhoy sa shooting incident.
Suno kay Palomo, mahimo nga mapasakaan sang kaso si Paloma sa tion nga mapamatud-an nga nagbutig ini sa imbestigasyon.
Samtang, ginpahayag dugang sang natungdan nga antes mapasakaan sang kaso ang duha ka police officers, kinahanglan sang mga ini mapamatud-an nga inosente ini.
Para kay Palomo, kinahanglan nga itugyan sa Prosecutor’s Office ang pag-determine sang probable cause sa insidente.
