ILOILO  CITY–Ginakabig sang Iloilo Police Provincial Office (IPPO) nga sabat sa illegal gambling ang ang pagbalik sang Small Town Lottery (STL) operation sa probinsya sang Iloilo.
Sa interview sang Bombo Radyo kay Police Senior Superintendent Marlon Tayaba, Director sang IPPO, iya ginpahayag nga gina abi-abi niya ang Red Subay Gaming Corporation bilang bag-o nga operator sang STL sa probinsya.
Sunu kay Tayaba, ginahulat na lang nila nga makig-angot sa ila ang bag-o nga STL operator bag-o makasugod sang STL operation.
Nagapati si Tayaba nga dako nga bulig ang pag-operate sang legal nga STL sa probinsya agud mapahagan-hagan ang bukis.
Kinahanglan lamang sunu kay Tayaba nga makig-angot sa ila ang bag-o nga STL operator agud nga maplastar sa ila ang safety nets sang ila operasyon kag mabuligan sila nga madakop ang mga nagapataya sang bukis.