Gina abi-abi sang Iloilo Police Provincial Office ang reward system nga ginpatuman sang Sangguniang Panlalawigan sang Iloilo agud mapabaskog pa ang kampanya batok sa illegal nga droga sa probinsya.
Sa interview sang Bombo Radyo kay Plt Col. Rolando Araño, spokesperson sang Iloilo Police Provincial Office, iya ginpahayag nga dako ang mabulig sang amo nga programa agud mapadasig ang paghatag sang impormasyon batok sa mga nagabaligya sang illegal nga droga sa ila tagsa ka lugar.
Suno kay Araño, ang paghatag sang reward sa mga informants makapugong gid agud nga indi na magdako pa ang mga tawo nga naga-engage sa illegal nga buluhaton.
Suno pa sa iya nga apisar magahatag sang reward money may yara sila sa gihapon sang proseso antes mahatag ini agud masiguro nga nagakaigo kag lehitimo ang impormasyon nga ginhatag sang mga informants.
Dugang pa sini, bangud sang partisipasyon sang mga residente, nagahatag ini sang positibo nga impact sa komunidad.
Nagapati man ang Iloilo Police Provincial Office nga pinaagi sa suporta sang publiko, mabuhinan gid ang presensya sang illegal nga droga sa probinsya.
Nagpangabay man ini sa publiko nga padayon nga suportahan ang mga kapulisan agud maproteksyunan ang pumuluyo ilabi na ang masunod nga henerasyon batok sa peligro nga dala sang illegal nga droga.
