ILOILO CITY – Gina-chekyar sang kapulisan ang mga bulangan sa probinsya sang Iloilo kun bala may yara sang functional nga CCTV camera.
Sa interview sang Bombo Radyo kay PSMSgt. Francisco Lindero Jr., spokesperson sang Iloilo Police Provincial Office (IPPO), iya ginpahayag nga ang CCTV camera ang kabahin sang requirement sang Philippine Amusement and Gaming Corporation (PAGCOR) sa paghatag sang lisensya sa pagpatigayon sang online nga bulang.
Suno kay Lindero, bangud wala gin-aprubahan ni Presidente Rodrigo Duterte ang resolution sang senado nga naga-suspend sang e-sabong operation sa pungsod, nagmandu si PNP Chief Police Director General Dionardo Carlos sa tanan nga police units sa pungsod nga monitor-on ang tanan nga bulangan kun bala naga-function ang ila nga CCTV cameras.
Sa tion nga makita sang pulis nga wala naga-function ang CCTV camera, mapasa sang report ang PNP sa local government unit (LGU) kun sa diin nahamtang ang bulangan kag subong man sa PAGCOR.
Pahayag ni Lindero, wala sang otoridad ang PNP nga magpasirado sang mga bulangan kundi mangin basehan lamang sang LGU ukon sang PAGCOR ang ila nga report.
Sa pre-recorded Talk to the People sang presidente, iya ginpahayag nga dako ang epekto sa revenue sang pungsod kun i-suspend ang operation sang e-sabong.
Santo naman sa DILG Memorandum Circular 2022-003, sa mga lugar nga yara sa idalom sang alert level 1 kag 2, ang operasyon sang traditional nga bulang ang ginapahanugutan sa kondisyon nga may yara sang approval sa concerned LGU kag istrikto nga sundon ang COVID-19 health protocols.
