ILOILO CITY- Ginapabaskog pa sang Iloilo Police Provincial Office (IPPO) ang kampanya batok sa illegal quarrying sa probinsiya.
Ini kasunod sang asud-asud nga apprehension sang Zarraga Municipal Police Stations sa apat ka mga trucks nga may karga nga quarry materials sa sulod lang sang duha ka adlaw.
Sa interview sang Bombo Radyo kay IPPO Director PCol Adrian Acollador, iya ginpahayag nga padayon ang ila checkpoints agud malantaw ang mga truckers kun legal ang ila resibo nga ginauyatan.
Suno kay Acollador, may direktiba man ini sa municipal police stations nga masami ginalabayan sang sini nga mga trucks.
Gin-ako naman ni PMajor Rowena Hubero, hepe sang Barotac Nuevo PNP nga indi man nila ma-monitor ang tanan nga trucks nga nagakarga sang illegal quarry materials bangud indi man sa tanan nga tion nagapatigayon sila sang checkpoint
Suno kay Hubero, may katungdanan man ang barangay kun sa diin nagahalin ang mga truck nga lantawon ang delivery receipt agud mahibaluan kun legal ang paghakot sang balas kag bato.
Nahibaluan nga gindakop sang otoridad sa Zarraga ang duha ka trucks nga may karga nga quarry materials bangud wala sang nagakaigo nga dokumento ang ila karga nga mga balas.
Ini nga mga trucks ang nagahalin sa Anilao kag nagalabay sa kabanwahanan kaangay sang Barotac Nuevo kag Dumangas.
