Ginakabig sang Iloilo Police Provincial Office (IPPO) nga dako nga bulig ang mga pumuluyo nga naga-report sang mga posible durugista sa ila lugar.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga padayon ang monitoring sang talatapan sa drug situation sa probinsya.
Suno kay Araño, indi manegar nga padayon sa gihapon nga may nagasulod nga iligal nga druga apang, bangud man sa bulig sang mga pumuluyo, mas napahagan-hagan ini.
Gintuad man sini nga sugod sang Marso 10 tubtob Marso 16, 2025, natigayon nga makumpiskar sang talatapan ang masobra tatlo ka kilo nga iligal nga druga ukon shabu.
Ini ang nagabalor sa malapit 21 million pesos.
Nagapati man ang natungdan nga dako ang role sang Ilonggo community sa pagtapna sang iligal nga druga sa Iloilo.
