Ginakabig sang Iloilo Police Provincial Office nga “remarkable success” ang law enforcement operations nga ginpatigayon sang 2024.
Sa interview sang Bombo Radyo kay PMaj. Rolando Araño, spokesperson sang Iloilo Police Provincial Office, iya ginpahayag nga ang pagsalig kag suporta sang Ilonggo Community amo ang key components sang madinalag-on nga mga operasyon sang kapulisan batuk sa iligalidad.
Sang Enero 1 tubtob Disyembre 31, 2024, gin-intensify pa sang Iloilo Police Provincial Office ang law enforcement operations batuk sa illegal drugs, wanted persons, illegal gambling, loose firearms, illegal fishing, kag illegal quarry.
Sa kampanya kontra iligal nga droga, 369 ka mga operasyon ang ginpatigayon nga nagresulta sang 477 nga pagkaaresto sang mga indibidwal lakip na ang 109 high-value individuals kag 383 street-level individuals.
Nakakumpiska ang kapulisan sang droga nga nagabug-at sang 13,982.23 grams nga nagabalor sang P95 million. Ang nasambit nga operasyon ang nagresulta man sa pag-file sang 1,011 drug-related cases.
Agud masiguro nga makuha ang hustisya, nakapatigayon ang IPPO sang 1,123 operations nga nagresulta sa pagkaaresto sang 1,131 wanted persons lakip na ang 238 ka mga most wanted individuals kag 890 ka iban pa.
Suno kay Araño, bilang kabahin sang inisyatibo nga mapapas ang illegal gambling, 146 ka mga operasyon ang natigayon nga nagresulta naman sang pagkaaresto sang 374 ka mga indibidwal kag pagkumpiskar sang P143,858.00 nga balor sang pustahanay. Kabug-usan nga 158 cases ang gin-file may kaangtanan sa amo nga operasyon.
Sa kampanya naman kontra iligal nga armas, nakapatigayon ang IPPO sang 175 operations sa diin 154 ka mga indibidwal ang naaresto kag 178 ka mga armas luthang ang nakumpiska. Dugang nga 472 ka mga armas ang boluntaryo nga gin-surrender kag 93 naman ang gin-deposit para mabutang sa safe nga lugar.
Pahayag sang natungdan, may yara man sang 355 ka mga operasyon nga ginhimo ang kapulisan batuk sa illegal quarry sa diin nagresulta ini sa pagkaaresto sang 376 individuals kag pag-impound sang 374 ka mga salakyan.
Agud man masuportahan ang marine conservation efforts sang Iloilo, nakapatigayon sang 259 ka mga operasyon ang IPPO batuk sa illegal fishing sa diin 726 ang naaresto kag 382 ka mga sakayan ang nadakpan. Nakumpiska man ang mga isda balor P1 million halin sa iligal nga aktibidad.
Nagpasalig ang natungdan nga subong nga 2025, magapadayon ang Iloilo Police Provincial Office sa pagpasangkad sang mission sang kapulisan sa pagpasiguro sang safety kag mahatag ang hustisya nga para sa tanan.
