Nagpaathag ang Iloilo Police Provincial Office (IPPO) nga wala sang dapat nga kahangaw-an ang pumuluyo sang Ajuy, Iloilo.
Ini kaangot man sa ginpadala nga letter ni Board Member Carol V Espinosa-Diaz kay IPPO Director Police Colonel Bayani Razalan natuhoy sa ginapasuni armado nga mga lalaki sa banwa.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga gilayon nga nagmando si Razalan nga i-validate ang amo nga impormasyon agud nga maimbestigaran.
Suno kay Araño kag santo man sa inisyal nga impormasyon nga ginhatag sang hepe sang Ajuy Municipal Police Station, ila gin-athag nga katapo sang private security kag gin-hire sang Local Government Unit (LGU) sang Ajuy ang mga armado nga guwardya.
Ginpat-ud man sini nga ini agud nga magsekyar ang ila nga mga opisina sa Ajuy Ville nga area, kon sa diin ginpahamtang ang ila nga food festival ukon mas kilala sa tawag nga Tambobo Festival.
Ginpahayag man sang natungdan nga ang purpose sang mga guwardya amo nga magbantay sa seguridad sang tagsa ka opisina.
Gina-ekspektar man sang banwa nga magadugok ang mga tawo kag kon indi mabantayan, ginalantaw naman nga dako ang posibilidad nga masulod sang mga kawatan.
Gin-athag man sang IPPO nga verified kag may mga lisensya ang mga guwardya agud magpatuman sang security measures sa lugar.
