Gintuad sang Iloilo Police Provincial Office (IPPO) nga may gina-monitor ang talatapan nga armed group sa probinsya sang Iloilo nga mahimo makatuga sang huol sa palaabuton nga 2025 midterm elections.
Sa interview sang Bombo Radyo kay Police Colonel Bayani Razalan, Director sang Iloilo Police Provincial Office (IPPO), iya ginpahayag nga nagabantay sila subong sa mga boundaries sang Iloilo lakip na ang boundary sang Capiz kag Iloilo.
Suno kay Razalan, military focused operation ang igapatuman lakip na diri ang bulig sang kapulisan.
Ginlaragway sini nga isa ka ‘private armed group’ ang ginasundan sang IPPO, kon sa diin ginalauman makapanggamo kon indi mabantayan.
Wala naman ini ginpangalanan ni Razalan apang ginbuyagyag sini nga yara sa first and second district sang Iloilo.
Nagpasalig man ang natungdan nga mabaskog ang ila koordinasyon sa Armed Forces of the Philippines (AFP) agud nga mas masangkad ang pagpatuman sang on the ground operation.
Nahibaluan nga indi magnubo sa pulo ka mga kandidato ang nagkuha sang PNP security agud nga maprotektahan ang ila banwa sa ano man nga pagpamahog sa palaabuton nga eleksyon.
