ILOILO – Magatutok ang Iloilo Police Provincial Office (IPPO) sa mga election hotspots kadungan sa nagahilapit nga 2023 Barangay and Sangguniang Kabataan Elections sa Oktubre 30.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga may ginalantaw na ini nga mga lugar nga mainit ang eleksyon kag posible may presensya sang terrorist armed group.
Suno kay Araño, mangin basehan sang talatapan ang nagligad nga record sang election nga may yara sang tensyon ukon kinagamo.
Ginpahayag dugang sang natungdan nga wala nagahatag kumpiyansa ang mga kapulisan apisar malinong ang lugar sa diin hugot ang monitoring sang mga ini.
Wala naman ginhingadlan pa ni Araño ang mga lugar nga ginapanan-aw nga mangin mainit ang sitwasyon sa eleksyon.
Samtang, magapakig-angot man ang Iloilo Police Provincial Office sa Philippine Army agud makaupod sa pagpatuman sang matalunsay nga election.
