Mas ginpasangkad sang Iloilo Police Provincial Office (IPPO) ang ila nga anti-criminality efforts sa bulan sang Abril antes ang 2025 National and Local Elections.
Sa ila kampanya kontra sa illegal nga droga, naaresto ang 48 ka mga indibidwal kung sa diin 13 ang High-Value Individuals (HVI) kag 35 ang Street-Level Individuals (SLI).
Nakumpiskar diri ang 1,585.25 grams sang suspected shabu nga may estimated Standard Drug Price (SDP) nga Php 10,043,010.00.
Natigayon man nga madakpan ang 66 ka mga wanted persons kag ang 22 ka mga Most Wanted Persons.
Sa kampanya sa illegal gambling, nakaaresto sang 34 ka mga indibidwal kag nakakumpiskar sang Php 12,176.00 nga bet money.
Sa mas ginpasangkad nga kampanya kontra sa loose firearms, nagresulta ini sa pagkakumpiskar sang 64 ka mga armas sa 25 ka mga police operations nga ginalakipan sang 19 confiscated unlicensed firearms, 29 nga gin-surrender, kag 16 ka deposited firearms.
Kaangot diri, kabugusan nga 18 ka mga indibidwal ang naaresto.
Sa campaign against illegal fishing, ang IPPO nag-conduct sang 21 ka mga operasyon, nga nagresulta sa pagkaaresto sang 71 ka mga indibidwal, 44 fishing boats ang na-apprehend kag pagkumpiskar sang balor sang isda nga naglab ot sa Php 45,900.00.
Ang anti-illegal quarrying campaign nagresulta man sa 14 ka mga police operations, 17 indibidwal ang na-apprehend kag 17 ka mga quarry vehicles ang na-impoundl.
Sa bahin sang kampanya kontra sa illegal logging, naaresto diri ang 4 ka mga indibidwal, nakumpiskar ang 2,263 board feet of lumber nga may estimated market value nga Php 86,638.00.
Gindayaw naman ni IPPO Provincial Director Police Colonel Bayani Razalan ang mga personnel sang Iloilo Police Provincial Office sa ila nga dedikasyon kag serbisyo para sa pumuluyo sang probinsya sang Iloilo.
Article: Bombo Hanna Andasa
