ILOILO CITY–Ginhatagan sang mandu sang pamunu-an sang Iloilo Police Provincial Office (IPPO) ang bag-o nga hepe sang Guimbal Municipal Police Station matapos nga ginkakas sa pwesto ang anay nga hepe nga si Police Senior Inspector Antonio Monreal Jr.
Sa interview sang Bombo Radyo kay P/CInsp. Reymond Celoso, ang bag-o nga hepe sang Guimbal Municipal Police Station, iya ginpahayag nga ginmanduan siya ni IPPO Director PSSUPT Marlon Tayaba nga nagakadapat ubrahon sang maayo ang iya katungdanan sa pumuluyo sang Guimbal sa diin dapat nga magapangibabaw ang rule of law.
Nagpanawagan man si Celoso sa mga pumuluyo sang Guimbal nga magbinuligay agud mapadayon ang ila malinong nga lugar.
Nahibaluan nga bag-o tanan ang mga pulis sa nasmabit nga police station matapos ang natabo nga ginapahayag pagsakit ni 1st Distric Cong. Richard Garin kay PO3 Federico Macaya Jr.