ILOILO – Ginmanduan sang Iloilo Police Provincial Office ang talatapan sang Oton Municipal Police Station nga ipaathag ang natabo nga delay sa pagresponde sang pulis sa shooting incident sa Barangay Mambog, Oton, Iloilo kaina sang aga.
Una na nga nagpahayag si Punong Barangay Vanessa Salinas nga kapin isa ka oras ang delay sa pag-abot sang pulis sa crime scene bangud wala sang may nagasabat sa ila nga cellphone.
Sa interview sang Bombo Radyo kay Police Colonel Gilbert Gorero, director sang Iloilo Police Provincial Office, iya ginpahayag nga base sa call log nga ginpresentar sang Oton MPS sa iya, 10-15 minutos lang ang delay — kag indi isa ka oras.
Bisan ano man kalip-ot ang delay, dapat nga ipaathag ini sang pulis suno kay Gorero ilabi na bangud isa ang patay kag isa ang kritikal sa amo nga pagpangluthang.
Gin-ako man ni Gorero nga daan na ang mga government-issued cellphone nga ginagamit sang police station — isa sa mga gintumod nga rason sang Oton MPS nga wala sang may nabatian nga ring tone sang nagpanawag si Punong Barangay Salinas kaina sang aga.
Paathag naman ni Gorero, ginaproseso na ang pagbakal sang bag-o nga units sang cellphones para sa mga pulis sa bug-os nga rehiyon.
Indi ini ang una nga bes nga wala sang sabat ang Oton MPS sa mga pamangkot sang Bombo Radyo.
Subong nga adlaw, wala man nakapa-interview ang hepe nga si Police Captain Robert Jason Pancha may kaangtanan sang dalagan sang kaso sang suspek bangud ginapahayag nga may yara pa siya sang online class.
Suno naman kay Gorero, matuod nga may mga station commanders nga may ongoing training kag ginapaagi ini virtually.
Apang suno sa IPPO director, anuman ang rason, responsibilidad gihapon sang hepe nga himuon prayoridad ang iya trabaho bilang pulis.
