ILOILO – Mas makapaayo nga ibalik ang checkpoint sa tagsa ka banwa sa probinsya sang Iloilo.
Ini ang pahayag ni Iloilo Gov. Arthur Defensor Jr. may kaangtanan sa ginduso nga resolusyon sang Sangguniang Panglalawigan may kaangtanan sa nagapadayon nga General Community Quarantine.
Sa interview sang Bombo Radyo kay Defensor, iya ginpahayag nga mas makapaayo nga may yara sang checkpoint agud nga may katahap ang bisan sin-o nga magpanglugayawan.
Suno kay Defensor, daku ang bulig sang police visibility bangud nga madamo ang nagkaladakpan nga nagapalusot sang makahulubog nga ilimnon.
May kaangtanan diri, mas makapaayo man suno sa gobernador nga may yara sang dala nga General Community Quarantine pass sa tion nga magguwa sa balay.
May kaangtanan diri, gilayon nga ginmandu ni Iloilo Police Provincial Office Director Police Col. Paul Kenneth Lucas nga ibalik ang checkpoint sa bug-os nga probinsya sang Iloilo.
Suno kay Lucas, random checkpoint lang ang ginapatigayon epektibo subong nga adlaw, Mayo 21, sa baylo nga 24/7 checkpoint.
Ginpahayag ni Lucas nga paagi sa random checkpoint, madamo ang nagkaladakpan nga nagapalusot sang makahulubog nga ilimnon sa paghuna-huna nga wala na sang checkpoint nga ginapatigayon.
