ILOILO CITY – Nagpaandam ang Iloilo Police Provincial Office batuk sa mga durugista nga naga-operate sa probinsya sang Iloilo.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga magapangatubang sang nagaka-igo nga kaso ang sin-o man nga na-angut sa iligal nga droga.
Pamatuod diri suno kay Araño ang pagkadakup sang duha ka mga punong barangay sang damlag lang.
Nagpasalamat man ang talatapan sa publiko nga nagabulig pinaagi sa paghatag sang mga impormasyon sa kapulisan.
Ginkasubo naman sang Iloilo Police Provincial Office ang pagka-angut sang isa ka pulis sa Pototan Municipal Police Office kun sa diin, ginatudlo ini nga protector sang durugista.
Apang suno kay Araño, gilayon nga nagpatigayon sang imbestigasyon ang talatapan agud nga ma-verify ang alegasyon sang durugista nga nadakpan.
Samtang, humalin sang Marso 2023 tubtob sa Hulyo 19, nagdangat sa masobra 1.5 nga kilo sang droga ang na-recover sang Iloilo Police Provincial Office sa 126 tanan ka mga operasyon.
Naglab-ot naman sa P10.5 million ang standard drug price nga na-confiscate sa 156 tanan ka mga durugista sa bilog nga probinsya sang Iloilo.
