ILOILO CITY – Nagpanawagan ang Iloilo Police Provincial Office sa publiko nga indi pag-ibutang sa kamot ang hustisya.
Ini matapos ang sunud-sunod nga kaso sang pagpamatay sa probinsya.
Sa interview sang Bombo Radyo kay Police Colonel Ronaldo Palomo, direktor sang Iloilo Police Provincial Office, iya ginpahayag nga ang ini nga mga isolated cases ang natabo kadungan sang mga fiesta kag iban pa nga aktibidad.
Ang iban naman nga mga krimen ang nagakatabo bangud sa away sa pamilya.
Bangud sini, nagpahanumdom si Palomo sa publiko nga mangin maintindihon.
Sa away pamilya naman, dapat nga panumdumon sang tagsa-tagsa nga ang mangin biktima ang ginakabig man nga pamilya.
Suno pa kay Palomo, may nagkalain-lain man nga ahensya ang gobyerno nga handa nga maghatag sang solusyon sa tagsa ka problema.
Nagpasalig man si Palomo nga nakahanda ang kapulisan nga magbulig kag ginapasangkad na ang police visibility agud nga malikawan ang pagluntad sang mga krimen.
