ILOILO CITY – Nagpasalamat ang Iloilo Police Provincial Office sa dako nga bulig sang publiko sa madinalag-on nga kampanya kontra sa iligal nga droga.
Kun ikumpara sang nagligad nga tuig, nagsaka sa masobra 200% ang ginpatigayon nga anti-illegal drug operation sang Iloilo Police Provincial Office subong nga tuig.
Sa interview sang Bombo Radyo kay Police Colonel Ronaldo Palomo, direktor sang talatapan, iya ginpahayag nga isa sa pinakadako nga rason sang madinalag-on nga kampanya sang kapulisan sa probinsya amo ang timely information nagikan sa publiko.
Nagapakita lamang ini suno kay Palomo nga ang mga Ilonggo ang nagasuporta sa kapulisan.
Ang gin-intensify pa nga intelligence operation sang kapulisan ang nakabulig man sa madinalag-on nga kampanya kontra iligal nga droga.
Nagapanawagan man ini sang suporta nagikan sa mga barangay officials kag iban pa nga mga stakeholders agud nga mangin drug-free ang mga barangays.
Sa probinsya, masobra na sa 80% nga mga barangays ang drug-free base sa validation sang Regional Oversight Committee.
