Iloilo – Ginatutukan subong sang Iloilo Police Provincial Office ang pagpahamtang sang checkpoints kag pagpatrolya kasunod sang asud-asud nga insidente sang pagpangluthang sa nanuhay-tuhay nga mga lugar sa probinsya sang Iloilo.
Matandaan nga ginluthang-patay si Allen Sanchez sang Marso 23 sa Barangay Linobayan, Tigbauan Iloilo sang indi pa mahingadlan nga mga tawo.
Samtang, maswerte naman nga nabuhi si Glen Paloma matapos nga ginluthang sang apat ka mga lalaki sa Barangay Calaboa, Leganes, Iloilo sang Marso 26.
Nahibaluan nga ang duha ka mga biktima ang nakaagi na preso bangud sa pagbayolar sa layi kag pagkaangot sa iligal nga droga.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga wala sang dapat kabalak-an ang mga pumuluyo sa probinsya sang Iloilo bangud sa mga ginpreparar nga security measures sang mga kapulisan.
Suno kay Araño, ginpahugot na sang talatapan ang monitoring ilabi na sa ‘movement’ sang mga tawo nga naangot sa illegal drug trade.
Ginpahayag dugang sang natungdan nga kontrolado sang mga ini ang sitwasyon sa pagpabilin sang kalinong kag katawhay sa probinsya.
Sa subong, may yara na sang persons of interest ang mga kapulisan sa mga suspetsado nga nagpangluthang sa mga biktima.
Nagapabulong naman si Paloma sa ospital matapos nga nakaangkon sang pilas sa nagkalain-lain nga bahin sang lawas.
