Nagpasalig ang Iloilo Police Provincial Office (IPPO) nga mahatagan sang hustisya ang pamilya sang barangay kagawad nga gintiro-patay sa Barangay San Rafael, Tigbauan, Iloilo.
Ang biktima sa insidente amo si Joevani Triste, residente sang nasambit nga lugar; samtang ang suspek naman amo si John Castro Jr.
Sa interview sang Bombo Radyo kay Police Colonel Bayani Razalan, Director sang Iloilo Police Provincial Office, iya ginpahayag nga wala sang ginakahadlokan ang ahensya sa pagresolba sang kaso agud mahatagan sang hustisya ang kamatayon ni Kagawad Joevani Triste.
Suno kay Razalan, nagbutang na sila sang mga security measures sa pamilya Triste agud nga mapabilin sila nga safe samtang nagadalagan ang kaso.
Ginpaidalom man sa witness protection program ang mga witnesses sang kaso agud nga mapalayo man sila sa kasablagan.
Naghingyo man ang talatapan sang bulig sa publiko nga gilayon sila magpakig-angot sa kapulisan kon may impormasyon nga nahibaluan nga mahimo makabulig sa paghatag hustisya sa pamilya Triste.
Una na nga ginkumpirma ni Razalan nga nakarehistro kay AAMBIS-OWWA Party-list Representative Atty. Lex Colada ang armas nga gingamit ni Castro sa pagluthang-patay kay Joevanie Triste.
