ILOILO – Nagaisahanon ang Iloilo Police Provincial Office (IPPO) sa mga units sa Police Regional Office 6 (PRO-6) nga nadala sa final list sang 2nd BGen Rafael T. Crame Balangay Awards subong nga tuig.
Sa interview sang Bombo Radyo kay Police Master Sergeant Francisco Lindero Jr., tagpamaba sang IPPO, iya ginpahayag nga nalipay gid kag bugalon ang pamunuan nga ila nabaton ang nasambit nga award sa una nga kahigayunan.
Ang Balangay Awards ang isa ka tuigan nga pagpasidungog sang Philippine National Police (PNP) sa mga police units nga may maayo kag talalupangdon nga kampanya batok sa iligal nga droga, korapsyon, terorismo, kag iban pa nga sahi sang krimen.
Suno pa kay Lindero, ang amo nga award ang nagapakita lang sang maayo nga partnership sa tunga sang kapulisan kag sang komunidad.
Ginalauman man sang natungdan nga pagkatapos sini, labi pa nga maga-uswag ang pagbinuligay sang mga pumuluyo kag otoridad agud mabatuan ang mga krimen.
Dugang pa ni Libertad, halin sang nagliligad nga mga tuig, nagapanguna na ang IPPO kun ‘police community relations’ ang pagahambalan.
Ang nasambit nga award ang ginbaton ni Police Colonel Paul Kenneth Lucas, officer-in-charge sang IPPO, sa Camp Crame sang Lunes, Pebrero 17.
Nakabaton ang pamunuan sang P200,000 kag Plaque of Appreciation.
