Iloilo – Pabakuron sang Iloilo Police Provincial Office ang ila police presence matapos ang serye sang pagpangawat sang mga fighting cocks kag brood cocks sa apat ka mga kabanwahanan sa probinsya sang Iloilo.
Matandaan nga nagluntad ang kinawatay sa magkatuhay nga mga inadlaw sa bulan sang Pebrero sa mga banwa sang Anilao, Guimbal, Oton kag Dingle, Iloilo.
Sa interview sang Bombo Radyo kay Police Lieutenant Colonel Ronnie Brillo, deputy provincial director for administration sang Iloilo Police Provincial Office, iya ginpahayag nga posible nga ang pagpanumbalik sa new normal sang cockfighting ukong pagbulang ang rason sang pagpangawat sang mga suspek.
Gin-athag naman Brillo nga indi konektado ang mga suspek sa isa kag isa.
Ginpahayag dugang sang natungdan nga natigayon nga ma-recover sa Tapaz, Capiz ang pito ka mga manok nga ginkawat sa Guimbal, kag isa ka brood cock sa Oton.
Sa subong, may mga intervention na nga ginapatuman ang Iloilo Police Provincial Office agud matapna ang krimen pinaagi sa pagpahamtang sang checkpoint kag regular nga pagpatrolya sang mga kapulisan.
