Sta. Barbara, Iloilo – Usisaon sang Iloilo Police Provincial Office (IPPO) ang mga duty personnel sang Sta. Barbara Municipal Police Station may kaangtanan sa pagkapalagyo sang tatlo ka mga preso.
Sa interview sang Bombo Radyo kay IPPO Director Police Colonel Marlon Tayaba, iya ginpahayag nga magapatigayun sila sang imbestigasyon agud mahibaluan kun ano ang nangin kapaltahan sang mga duty personnel sang tion nga nagpalagyo ang mga preso.
Suno kay Tayaba, alas 6:00 na sang aga sang natukiban nga bukas na ang karsel kag wala na ang tatlo ka mga preso nga sanday Bhrix Dela Cruz Sarin sang Candoni, Negros Occidental kag may kaso nga theft, Mark Armada Arca sang Brgy. Barasalon, Janiuay, Iloilo kag may kaso nga murder kag Reniel Lozada Sellarico sang Brgy. Talanghauan, Sta. Barbara, Iloilo kag may kaso nga rape.
Ginpapasa naman sang report ang hepe sang Sta. Barbara Municipal Police Station nga si Police Captain Rey Pabalan may kaangtanan sa insidente.
Nahibaluan ang on-duty nga jailer ang naga-duty man sa front desk kag sa radio monitoring rason nga nakapangita sang kahigayunan ang tatlo ka preso nga makapalagyo.
