Siyam ka adlaw matapos nasapwan ang bangkay ni Claire Diergos sa sulod sang iya salakyan sa Barangay Inangayan Sta. Barbara, Iloilo, wala pa sa gihapon sang eye witness sa krimen apang positibo gihapon ang Special Investigation Team nga mahatagan-kasanagan ang kaso bangud sang mga persona nga naga-execute sang ila affidavit nga mahimo magamit bilang ebidensya.
Una na nga ginpahayag sang Iloilo Police Provincial Office (IPPO) nga indi magnubo sa lima ka persona ang nagpasa sang affidavit subong nga adlaw, Nobyembre 4, nga makabig subong circumstancial evidence batok sa suspek ukon mga suspek sa likod sang brutal nga krimen.
Ini ang magluwas pa sa tatlo man ka persona nga nagpaidalom sa technical test kahapon, Nobyembre 3.
Sa interview sang Bombo Radyo kay Police Master Sergeant Francisco Lindero Jr., spokesperson sang IPPO, iya ginpahayag nga sa tanan nga mga anggulo nga ginsundan sang mga imbestigador, may isa gid nga nagpangibabaw sandig sa nalikop nga mga testimoniya kag ebidensya.
Ginatago gihapon sang otoridad ini nga mga impormasyon agud indi ma-kompromiso ang pagpangusisa.
Matandaan nga ang una nga mga anggulo nga ginasundan amo ang pagpangawat, utang nga kwarta, crime of passion, kag hatred ukon tuman nga kaakig.
Indi man pag-isapubliko ang pangalan sang mga nag-execute sang affidavit. May intel officers nga naga-monitor agud masigurado ang ila nga seguridad.
Mangin si Rodelyn Sumbong, kabulig sa balay ni Claire kag ginakabig crucial sa trabaho sang special investigation team, ang yara sa protective custody sang pulis.
Sang ginpadulungan sang Bombo News Team ang ila balay sa Cabilauan, Barotac Nuevo, Iloilo subong nga semana, ginpahayag sang ugangan sini nga nagakahangawa man sila sa seguridad sang ila pamilya bangud daw kaangay nga may naga-aligid sa ila nga mga balay.
Ang balay sa New Poblacion, Buenavista, Guimaras kun sa diin nahaya ang bangkay ni Claire, ang bantay-sarado man sang mga pulis sandig sa mandu sang director sang Guimaras Police Provincial Office (GPPO).
Sa Domingo, Nobyembre 7, natalana nga ilubong ang 36 anyos nga si Claire. ##
