ILOILO – Gin-athag ni Iloilo Police Provincial Office Director Police Colonel Bayani Razalan nga wala pa siya nakabaton sang pormal nga request nga ipa-relieve sa pwesto ang hepe sang San Joaquin Municipal Police Station nga si Police Captain Felix Perez kag mga tinawo sini.
Ini ang kasunod man sa panawagan ni Iloilo 1st District Rep. Janette Garin sa iya kag kay Police Regional Office 6 Director Police Brigadier General Jack Wanky nga sayluhon ang hepe kag mga tinawo sini.
Natabo ini sang Hunyo 10 sa diin personal nga nagpadulong si Garin agud pamatukan ang pagpasirado ni Vilma Sta. Cruz Getuya, iloy ni San Joaquin Vice Mayor Taba Getuya sang daan nga San Joaquin Mother and Child Hospital .
Sang amo nga tion, naghingyo si Garin sa mga pulis nga magbulig, apang daw kaangay suno sa mamalidha nga wala nila ginhimo ang ila papel agud mapabilin ang kalinong sang natabo ang kinagamo.
Sa interview sang Bombo Radyo kay Razalan, iya ginpahayag nga ang natabo sa San Joaquin Mother and Child Hospital ang land dispute kag pinamilya nga inaway.
Suno kay Razalan, kun may krimen nga matabo, gilayon sila nga makapatunga, apang kun may away sa propedad, kinahanglan anay nga magpadala sang sulat sa hepe, sa provincial director kag sa regional director.
Diri kag tun-an sang Legal Service kun ano ang mga dapat himuon.
Nagpatigayon naman sila sang zoom meeting suno sa natungdan sa diin nakasugtan nga hulaton anay ang desisyon sang korte sa isyu.
Sa bahin naman sang hepe, ginpahayag ni Razalan nga ginpangayuan na niya ini sang paathag kag kun mapamatud-an nga nakasala, mahimo ini pasakaan ang kaso.
