Magapatuman sang psychological debriefing ang Iloilo Police Provincial Office – Women and Children Protection Desk sa mga lamharon nga na-link sa ginaalegar attempted abduction.
Sa interview sang Bombo Radyo kay Police Major Liza Nofuente, Chief sang Iloilo Police Provincial Office – Women and Children Protection Desk, iya ginpahayag nga nagapakig-angot na sila sa mga kabataan agud magpatuman sang imbestigasyon.
Nagpanugyan man ini sa mga menor-de-edad nga naka-eksperyensya sang amo nga sitwasyon nga gilayon i-report sa ila talatapan agud mahatagan sang proper intervention.
Suno kay Nofuente, isa ang social media sa mga nagatuga sang fabrications sa kaisipan sang mga lamharon kon sa diin, nagahimo-himo sang istorya ukon scenario nga indi matuod.
Nahibaluan nga lakip sa mga alleged attempted abduction ang natabo sa Igbaras kon sa diin, ginahatagan sang iloy ang iya anak sang P1500 agud ibayad sa eskwelahan, apang nagasto ini sang bata kag naghimo-himo sang istorya nga ginhold-up sya kag gin-abduct.
Lakip man diri ang kaso nga alleged kidnapping sa Pototan, samtang sa Janiuay nga naglisensya nga maghimo sang school project apang wala na nakapauli kag natukiban sang WCP nga nag-upod sa iya ex-boyfriend kag nag-inom-inom sang makahulubog nga ilimnon.
Nabalhag man sang talatapan ang kaso sa Dumangas kon sa diin, ginapahayag nga ginsundan ini sang motorsiklo apang mas ginpakamaayo nga ipaidalom ini sa psychological tests.
Samtang, kapareho man ini sa kaso sa Barotac Nuevo nga gintanyagan sang dulsi sang duha ka lalaki apang ginkumpirma sang barangay official sa amo nga lugar nga wala sang naga-eksister nga amo nga report.
Pinakaulihi naman ang natabo sa Igtambo, San Miguel, kon sa diin, gindulogan sang van ang tatlo ka mga bata apang ulihi natukiban nga nagapangita lang sang kalan-an nga batchoyan ang driver sang van.
