Gin-atake sang Israel kag Estados Unidos sang Amerika ang Iran.
Pareho ini nga ginkumpirma sang Israel Defense Ministry kag ni United States President Donald Trump.
May mga pagsigabong nga nabatian sa Tehran nga amo ang kapital sang pungsod. Gin-target man ang areas malapit sa opisina ni Supreme Leader Ayatollah Ali Khamenei, apang indi klaro kun yara ang 86-anyos nga Iranian leader sang natabo ang pagsigabong.
Nagagwa man sa reports nga gin-atake man ang mga balay kag mga opisina sang mga lider sang Iran, kag pila ka mga lokasyon kun sa diin may yara sang major nuclear facility lakip na ang holy city sang Qom, amo man sa Karaj, Kermanshah, Lorestan, kag Tabriz.
Nagdeklarar naman ang Israeli government sang state of emergency sa bilog nga pungsod bilang pagpanghanda pananglitan magbalos ang Tehran.
Kumpirmado nga nagpanirado na sang airspace ang Israel kag Iran para sa civilian flights.
Natabo ang atake matapos ang sinemana na nga paandam halin kay Trump nga atakehon sini ang Iran kun wala sang may malab-ot nga kasugtanan kaangot sa nuclear program.
Sa latest statement ni Trump, ginsiling sini nga gin-umpisahan nila ang lapnagon nga “major combat operations” sa Iran.
Ginpaandaman man ni Trump ang pwersa-militar sang Iran nga i-surrender na ang ila nga mga armas.
Ginpanawagan man sini sa mga sibilyan sa Iran nga magpanago bangud sa mga pagpamomba, apang kadungan sini, nagpanawagan man siya nga magpanindugan kag i-take over ang ila nga gobyerno ukon ang Islamic Republic regime nga nagpamuno sa Iran halin pa sang 1979.
Nahibaluan nga antes sini, nagpadala ang US sang mga barko kag aircraft pakadto sa Middle East samtang gina-pressure nila ang Iran nga makig-istorya kaangot sa nuclear program.
Sang nagligad nga mga sinemana, may yara naman sang mga abiso ang nagkalain-lain nga mga pungsod para sa ila citizens sa Iran nga magbiya anay bangud sa ginapanan-aw nga daku nga tension.
