Ginpanindugan ni United States President Donald Trump nga may negosasyon subong kaupod sa Iran kaangot sa gyera sa Middle East.
Ginpahayag ini ni Trump apisar gintawag sang Iran nga “fake news” ang iya ginapangwakal kag nagapanginwala nga may yara sila sang gina-istoryahan.
“No negotiations have been held with the US, and fakenews is used to manipulate the financial and oil markets and escape the quagmire in which the US and Israel are trapped,” suno anay kay Iranian parliamentary speaker Mohammad Bagher Ghalibaf sa social media.
Suno naman sa US leader, naga-istorya ang iya nga administrasyon sa husto nga mga tawo sa Tehran, kag luyag gid sang amo nga mga tawo nga makalab-ot sila sa kasugtanan.
“We’re talking to the right leaders, and they want to make a deal so badly,” pahayag sini.
Pahayag pa ni Trump, involved gani mismo sanday Vice President JD Vance kag Secretary of State Marco Rubio sa diskusyon.
Gindugang man sang presidente nga nagpasugot ang Iran nga indi na sila mag-angkon ukon maghimo sang nuclear weapon. Bangud sa ila atake sa Iran suno kay Trump, may yara na sang pagbag-o sa rehimen.
“We can say this is regime change,” pahayag sini sa Oval Office. Dugang niya: “We’ve won this war.”
Una na nga ginpahayag ni Trump nga indi na sini pagdayunon ang iya pamahog nga bombahan ang power plants sang Tehran bangud may mga negosasyon na sila nga ginahikot agud matapos ang gyera nga nag-umpisa sang Pebrero 28, 2026.#
