Nag-umpisa na ang Iran sa lapnagon nga pagbalos sa pagpang-atake nga ginhimo sang Israel.
Gintawag sang Iran ini nga aerial attack nga True Promise 3 nga suno sa ila nag-igo sa dinosena nga target, military centers, kag airbases.
Ginkumpirma naman sang Israeli rescuers nga may pito ka mga tawo nga napilasan bangud sa Iranian missiles nga gipaulan sa Tel Aviv; apang sa separado nga reports, 40 na ka mga tawo ang ginapangbulong sa Israeli hospitals.
Makit-an sa isa ka footage nga gin-igo ang isa ka high-rise building sa amo nga syudad.
Suno sa Iran, ginatos ka ballistic missiles ang ila nga ginpa-ulan batok sa Israel.
Sabat naman sang Israeli military, indi gani maglab-ot sa 100 ka missiles ang nalunsar sang Iran kag gamay lamang ang nag-igo.
May impormasyon man nga nagbulig ang United States agud nga ma-intercept ang Iranian missiles; kag may iban pa nga mga pungsod sa Middle East nga nagbulig man sa Israeli air defenses.
Suno naman kay Israeli Defense Minister Israel Katz, naglapaw na sa linya ang Iran sang gin-igo nila sang missiles ang civilian population centers.
Nagpaandam man ini nga magbalos liwat.
Ini nga atake sang Israel ang natabo matapos nga nga ginbombahan man sang Israel kahapon sang aga ang Iranian nuclear sites kag ginguba man ang ila nga military leadership sa Tehran.
Gintawag ini sang Iran nga deklarasyon sang gyera.
Suno sa UN Ambassador sang Iran, 78 ka mga tawo ang napatay kag 320 ang napilasan bangud sa amo nga airstrikes sang Israel.
Lakip diri ang scientists kag mga commanders.
Sa iya speech nga gin-post, nagpahayag si Israeli Prime Minister Benjamin Netanyahu nga ang ang ila nga Operation Rising Lion ang wala gina-direkta sa mga pumuluyo sang Iran kundi sa ila nga gobyerno.
Nagdepensa si Netanyahu nga ang ila nga gina-target amo ang nuclear infrastructure, ballistic missile factories kag military sang Iran.
