Indi mag-untat ang Ilongga boxer kag Olympian nga si Irish Magno tubtub nga indi sini makuha ang bulawan nga medalya sa boksing.
Silver medalist si Magno sa bag-o lang nagtakop nga 31st Southeast Asian Games matapos nga napierde sa women’s flyweight final.
Ang nagpierde sa Ilongga boxer amo si Thi Tam Nguyen, ang Vietnamese nga naglutos man sa iya sa amo man nga event sang 2019 edition sang SEA Games diri sa Pilipinas.
Ini na ang ikaduha nga sunod-sunod nga tuig nga silver medal ang iya nga gindala pauli.
Sa interview sang Bombo Radyo kay Magno nga tumandok gid sang banwa sang Janiuay, iya ginpahayag nga ginhatagan anay ang boxing team sang Pilipinas sang duha ka semana nga pahuway antes magbalik sa Baguio para liwat sa training.
Ginpahayag sini nga magatinir siya kaupod ang iya pamilya diri sa Iloilo bangud antes pa man ang biennal meet sa Vietnam, duha ka bulan man siya kag ang iban nga Pinoy boxers nga nagtinir sa Thailand para sa ila nga training.
Ginpasalamatan ni Magno ang Ilonggo fans nga padayon nga nagasuporta sa iya nga mga hampang kag ginpasalig man nga padayunon pa gid ang pag-ensayo para sa sunod nga mga kumpetisyon.
Matandaan nga sang Domingo, Mayo 22, isa si Magno sa nagsabak sa gold medal match sa boksing sa SEA Games.
Ang iya kaupod nga sanday Rogen Ladon, Ian Clark Bautista kag Eumir Marcial ang lunsay nakadaog sang gold medals sa ila tagsa ka kumpetisyon.
