JANIUAY, ILOILO – Nagalaom ang Irrigators Association sang Janiuay, Iloilo nga mahatagan sang igtalupangod ni Presidente Rodrigo Duterte ang ila ginpasa nga petition batuk sa quarry operation nga ginapatigayon sa suba sakop sang Barangay Yabon, Calmay, Danao kag Tambal.
Sa interview sang Bombo Radyo kay Noel Alerta, Presidente sang Irrigators Association, iya ginpahayag nga ginakakulbaan sila nga mga mangunguma bangud posible nga mahubsan na sang tubig ang suba kag indi na makatubod pa ang irigasyon nga nagasuporta sa tuba nga ila ginatanom .
Suno kay Alerta, madulaan sila sang palangabuhian sa tion nga mapadayon pa ang quarry operation sa suba.
Sa Barangay Yabon kag Barangay Calmay, may yara sang ginabanta tag 20 tubtob 30 ka mga mangunguma; 35 sa Brgy Danao kag 15 tubtob 20 ka mga mangunguma naman sa Brgy. Tambal ang lunsay apektado sa quarry operation.
Sang una pahayag niya makadalawat pa sila sang 100 tubtob 120 ka sako sang tubo apang sa subong, 20 tubtob 25 ka sako na gid lamang kag ini bangud sa naga amat-amat na hubas ang tubig nga nagasulod sa irrigation canal.
