JANIUAY, ILOILO – Gin-athag sang Irrigators Association sang Janiuay, Iloilo, nga wala nila ginapamatukan ang pagpasemento sang farm to market road may kaangtanan sa ginareklamo nga quarry operation sa nabukid nga barangay sa nasambit nga banwa.
Sa interview sang Bombo Radyo kay anay SB Member Noel Alerta kag miyembro sang Irrigators Association sang Janiuay, Iloilo, iya ginpahayag nga mahimo man nga matigayon ang nasambit nga proyekto nga indi maakpektuhan ang irigasyon nga ginasaligan sang mga mangunguma.
Suno kay Alerta, humalin sang nag-umpisa ang quarry sa Brgy. Yabon, apektado na ang supply sang tubig sa irigasyon bangud nga nagdalom na ang suba.
Ginpahayag ni Alerta nga wala nila ginabalabagan ang quarry operation kun para ini sa kaayuhan sang tanan kag kun ginasunod lang ang layi.
Santo sa iya impormasyon kag sa iya nga pagpadulong sa quarry site sa Brgy. Yabon, ang BSP & Company Inc. ang nagapatigayon sang quarry operation kag sa ginpatigayon nga inspection kahapon, yara pa sa area ang equipment sang nasambit nga kompaniya.
