Nagpanawagan sang paathag kag pahayag nagikan sa Land Transportation Franchising and Regulatory Board (LTFRB) ang pila ka mga driver sang Libre Sakay nga wala pa nakabaton sang sweldo sa idalom sang sang service contracting program sang ahensya.
Nahibaluan nga natapos na ang nasambit nga programa sang LTFRB sang Hunyo 30, 2021.
Sa interview sang Bombo Radyo alyas Ruben, driver sang Libre Sakay sa Iloilo City, iya ginpahayag nga bisan paathag nagikan sa LTFRB kaangot sa status sang ila sweldo, wala man sila sang may nabaton tubtob subong.
Suno kay Ruben, kuntani maluoy man sa ila ang nasambit nga ahensya bangud ginpangabudlayan man nila ang ila ginahulat nga sweldo.
”Masobra duha ka bulan ang amon ginserbisyo tapos hasta subong wala kami may nabaton. Ti ano bi ang hangpon namon kay bisan ang LTFRB wala man gapahayag sa amon kun ano gid ang plastada.”
Pahayag niya, wala nila ginlauman nga ang ila ginpirmahan nga kontrata sa LTFRB para sa service contracting program sa idalom sang Bayanihan 2, amo pa ang maghatag sa ila sang problema sa baylo nga masolusyunan ang kagutom sang ila pamilya.
”Nagpasalamat kami nga may amo ina nga programa sa Bayanihan 2 pero isa gali niya ka madulom nga damgo para sa amon. Nag-ECQ na kita, nagutuman na kita, nawad-an pa kami palangabuhian.”
Dugang pa niya, lubong na siya sa utang ilabi na nga nag-untat ang kadam-an sa ila nga mga driver sa pagbyahe kag kuntani binag-binagon man ini sang LTFRB.
”Maluoy man kamo sa amon nagutom na pamilya namon, lubong pa kami sa utang.’
