Gin-athag sang isa ka abogado nga apisar nag-withdraw na ang Pilipinas sa International Criminal Court (ICC), may ara ini sa gihapon sang obligasyon sa mga kasugtanan nga gin-aprubahan sang pungsod sang miyembro pa ini sang Rome Statute.
Ini kasunod sang pagpalagyo ni Senator Ronald “Bato” dela Rosa matapos nagaguwa ang impormasyon nga serbehan ini sang warrant of arrest may kaangtanan sa imbestigasyon sang ICC sa maduguon nga kampanya batok sa illegal nga droga sang nagligad nga administrasyon ni anay Presidente Rodrigo Roa Duterte kun sa diin siya ang nagserbe bilang PNP Chief.
Sa interview sang Bombo Radyo kay Atty. Rodel A. Taton, DCL, Dean sang Graduate School of Law sang San Sebastian College–Recoletos sa Manila, ginpahayag sini nga indi dapat pagtawgon sang publiko nga “foreign court” ang ICC bangud isa ini ka international tribunal nga ginpatukod paagi sa treaty ukon kasugtanan nga gin-updan sang Pilipinas sang Nobyembre 1, 2011 tubtob Marso 2019.
Suno kay Taton, sala ang pila ka interpretasyon nga nagasiling nga wala na sang responsibilidad ang Pilipinas sa ICC bangud sang pag-withdraw sini bangud kaangay sang domestic law may relasyon ang international law sa sistema sang layi sa Pilipinas.
Dugang pa ni Taton nga importante nga maintindihan ang layi sang ICC kag ang relasyon sini sa konstitusyon kag international obligations.
Ginpahayag pa sini nga indi dapat pag-intrahan sang isyu political ang kaso nga ginapangatubang sang mga nadalahig ilabi na nga ang crimes against humanity nga kaso may yara sang mga biktima nga asta sa karon nagapangita pa sang hustisya.
