JAPAN – Isa ka aircraft kag duha ka patrol boats ang ginagamit sa subong sang Japanese Coast Guard sa padayon nga search and rescue operation sa naglugdang nga Gulf Livestock 1 bangud sa bagyo Maysak sa Japan.
Suno kay Bombo International Correspondent Josel Palma, kun kahapon, Setyembre 6, aerial search and rescue operation lang ang ginpatigayon apang sa subong, ginpahanugutan na ang paglayag sang sea vessel.
Ginpahayag ni Palma nga nagalaum ang Japanese Coast Guard nga may masagop pa nga crew sang barko kun sa diin partikular nga ginatutukan amo ang kalalawran nga sakop sang Amami Ōshima Island sa Kagoshima Prefecture.
May kaangtanan naman sa 39 ka mga Filipino crew, ginpahayag sang natungdan nga padayon nga nagapakig-angot ang Philippine Government sa Japanese Coast Guard, tag-iya sang barko lakip na sa manning agency para sa dugang nga update kag sa pagpalab-ot sang nagakaigo nga bulig.
Sa 43 ka crew sang barko, 39 diri ang Filipino kun sa diin duha ang nasagop na kag isa ang patay.
May kaangtanan naman sa paglaslas sang bagyo Haishen sa Japan, naglab-ot na sa 2 ang patay, 4 ang missing kag 108 ang napilasan.
Nahibalu-an nga ginsuspende ang search and rescue operation sa naglugdang nga Gulf Livestock 1 bangud sa paglaslas sang bagyo Haishen.
