ILOILO CITY – Dakop sa drug buy bust operation ang isa ka babaye kag duha ka mga agi sa Iloilo Fish Port Complex, Tanza Baybay, Iloilo City.
Ang mga nadakpan amo sanday Lala Jane Alidon, 28 anyos, Homer Morales, 25 anyos kag Alex Minoza, 24 anyos, lunsay tumandok sang Cebu.
Sa interview sang Bombo Radyo kay Police Lt. Col. Jonathan Pablito, hepe sang Iloilo City Police Station 1, iya ginpahayag nga ang naka monitor sa tatlo ka mga persona amo ang security officer sang isa ka mall sa diin masami sila makit-an nga may mga ka transaksyon.
Suno kay Pablito, nakuha ang tatlo ka mga suspected shabu lakip na ang isa ka buy bust item.
Ang buy bust money ang nagabalor naman sang P1,100.
Dugang pa sang natungdan, ginapahayag may mga Ilonggo nga kaupod ang tatlo ka mga nagkaladakpan sa diin kinahanglan nga i-monitor ini sang mga kapulisan.
Samtang makaligad pa lang ang pila ka minutos, may nagpadulong na nga senior citizen sa police station 1 agud nga ireklamo sanday Alidon, Morales kag Minoza nga nagkawat sang iya nga kwarta sa sulod sang iya bag.
Suno kay Lolita Esiderius, 79anyos, nadula ang iya kwarta balor P7,500 samtang yara siya sa sulod sang isa ka mall sa City Proper samtang nagabakal siya sang bayo.
Sang tion nga magbayad na ini kun tani, nakit-an niya nga wala na ang iya kwarta.
Ginatudlo ni Esiderius ang tatlo ka mga nagkaladakpan nga amo man ang nagkawat sang iya kwarta pinaagi man sa close circuit television footage gani iya ini nakilala.
Ibakal pa kun tani ni Esiderius sang bulong ang kwarta bangud pension pa niya ini.
