ILOILO CITY – Nagtuga sang kakulba kag pagsalangisag sa mga pumuluyo sang Sitio Riles, Benedicto, Jaro, Iloilo City matapos nga naigo sang kilat ang balay sang Barangay Secretary sang nasambit nga lugar.
Ini ang kadungan sang pagbubo sang ulan sa syudad sang Iloilo sa sulod sang kapin isa ka oras kaina sang hapon.
Maswerte nga wala sang may naulamid nga tawo sang nag-igo ang kilat sa balay ni Barangay Secretary Rowena Libo-on.
Naluk-ab ang foam sang katre sa sulod sang hulot sa diin nagpasalamat naman si Libo-on bangud nga wala sa ila balay ang iya kabataan sang natabo ang insidente.
Ginapatihan nga una nga naigo sang kilat ang puno sang lubi malapit sa balay ni Libo-on.
