Ginlamon sang kalayo ang isa ka balay sa Barangay San Jose, Arevalo, Iloilo City.
Ang nagapanag-iya sang balay amo si Roberto Tendencia, 84-anyos, residente sang nasambit nga lugar.
Sa interview sang Bombo Radyo kay John Ross Tendencia, apo sang tag-iya sang balay, iya ginpahayag nga naghalin ang kalayo sa kwarto sang iya nga lolo, apang indi niya matumod kon diin gid sa sulod sang kwarto nag-umpisa ang kalayo.
Suno kay Tendencia, bangud malapit ang iya kwarto sa kwarto sang iya nga lolo, gilayon sini nga nasimhotan ang aso, rason nga gilayon siya nga naguwa.
Ginpahayag man sini nga nag-umpisa nga nagdako ang kalayo alas-2:10 subong nga hapon.
Ginpakadismaya man sini ang mahinay nga pagresponde sang Bureau of Fire Protection (BFP), kon sa diin, gintumod niya nga 15 tubtob 20 minutos pa antes sila nga nag-abot sa lugar.
Gin-athag man sang natungdan nga lima sila tanan nga naga-istar sa amo nga balay.
Wala naman bisan isa ka gamit ang nasalbar sang pamilya matapos nga dali-dali sila naguluwa sa puluy-an.
Padayon pa nga ginaimbestigaran sang otoridad ang nagluntad nga sunog agud nga matumod ang gintunaan sang kalayo.
