ANILAO, ILOILO – Ginkumpirma ni Mayor Nathalie Ann Debuque nga isa ka residente sang Brgy. Rizal Estanzuela, Iloilo City nga naka pangasawa sa Anilao, Iloilo ang nagpositibo sa COVID -19.
Santo sa Facebook post ni Debuque, Agosto 11 sang nagguwa ang resulta sang confirmatory test sang pasyente nga isa ka call center agent sang IQOR.
Suno kay Debuque, Hulyo 25 ang last day of duty sang pasyente sa nasambit nga Business Process Outsourcing company kag nag home quarantine sa Anilao.
Agosto 7 sang nagbalik sa syudad sang Iloilo ang pasyente agud magpakuha sang swab sample para sa COVID-19 test kag gilayon man nga nagpauli sa nasambit nga banwa.
Sa subong, ang pasyente ang yara sa quarantine facility sang Anilao kag nagapabilin nga asymptomatic.
Padayon ang contact tracing kag may yara naman sang test kits nga gamiton para sa tanan nga naka-angkon sang close contact apang ginahulat pa ang pagbukas sang Western Visayas Medical Center Sub-National Laboratory matapos gin-lockdown kasunod sang pagpositibo sa COVID-19 sang isa ka staff.
