Ginpatpat sang isa ka dermatologist ang husto nga pag-atipan kag pagprotekta sa panit bilang una nga depensa sang lawas batok sa nagkalain-lain nga sakit.
Sa interview sang Bombo Radyo kay Dr. Jennifer Grendel Ganzon-Bernardo, FPDS, iya ginpahayag nga ang panit may dako nga papel bilang primary defense mechanism sang lawas kag isa ini ka tuman ka aktibo nga parte sang immune system.
Suno sa iya, importante nga ipabilin ang matinlo nga panit paagi sa regular nga pagpaligo kag paggamit sang mild nga habon ukon cleanser.
Gindugang pa niya nga dapat limitahan ang exposure sa adlaw kag maggamit gid sang sunscreen agud malikawan ang malain nga epekto sang sang ultraviolet rays.
Ginpakigbahin sini ang epekto sang hormonal changes nga mahimo makaapekto sa kondisyon sang panit gani importante ang healthy lifestyle, pareho sang pagkaon sang prutas kag pag-inom sang madamo nga tubig .
Lakip man sa iya mga paandam ang paglikaw sa pagpanigarilyo, sobra nga stress, kag indi man dapat mag-imbento sa pagbutang sang wala ginarekomendar nga bulong sa panit bangod mahimo ini makahatag sang mas dako nga problema.
