ILOILO CITY — Ginpa-Bombo sang isa ka driver sang Metro Iloilo Transport Service Cooperative (MITSCOOP) ang anay chairman sang kooperatiba nga si Jose Marie Delos Reyes bangud wala sini masweldohan ang mga driver.
Sa interview sang Bombo Radyo kay Elnar Almanzor, driver sang nasambit nga kooperatiba, iya ginpahayag nga wala sila nahatagan sang sweldo sa sulod sang 15 ka adlaw nga nagabalor sang P8,500.
Suno kay Almanzor, sobra 200 sila nga mga driver ang wala masweldohan bangud sa ginapahayag nga wala ma-settle nga paghalin sang anay chairman sang kooperatiba.
Ginpahayag man ni Almanzor nga sa katapusan kuntani sang Abril makuha nila ang sweldo apang bangud sa naglain na ang chairman sang MITSCOP, wala na ini nila nakuha.
Nahibaluan nga sa subong, may bag-o na nga chairman ang amo nga kooperatiba sa diin, nagpasalig ini nga mahatag ang sweldo sa katapusan sang Mayo.
Gin-athag naman sang anay chairman nga si Delos Reyes nga napasaka na niya sa Land Transportation Franchising and Regulatory Board (LTFRB) ang amo nga problema.
Suno kay Delos Reyes, may income ang kooperatiba nga wala na-remit umpisa Marso 26 tubtob Abril, rason nga wala nasweldohan ang mga driver antes siya nakahalin sa pwesto.
Nagalaum naman ang natungdan nga gilayon nga mahusay ang ila ginapangatubang nga issue.
