𝗔𝗟𝗜𝗠𝗢𝗗𝗜𝗔𝗡, 𝗜𝗟𝗢𝗜𝗟𝗢 — Patay ang isa ka estudyante matapos ginbuno sang hubog nga lalaki samtang nagainom-inom ini upod sang iya mga abyan sa Brgy. Manasa, Alimodian, Iloilo.
Ang biktima amo si Lester Capilitan Aldamar,19-anyos kag residenti sang Cabunga-an, Leon, Iloilo.
Ang suspek amo si Norberto Capilitan, 53, kag taga Brgy. Cabacanan, Alimodian ,Iloilo.
Sa interview sang Bombo Radyo kay Police Captain Chrysler John Ledesma, hepe sang Alimodian Municipal Police Station, iya ginpahayag nga samtang nagainom-inom ang biktima upod ang mga abyan sini nagkadto man ang suspek malapit sa area nga hubog kag nagasinggitan nga mangbuno.
Suno kay Pcpt. Ledesma nga gulpi lang ginpalapitan sang suspek ang biktima kag ginbuno gamit ang kutsilyo sa diin naigo gid ini sa tiyan.
Dugang pa sang natungdan nga ginbawian gid sang kabuhi ang biktima.
Ginhospital arrest naman ang suspek bangod sa naagom sini nga mga pilas sa ulo, kamot, kag tiyan sang nagtimalos ang mga abyan sang biktima.
Yara pa subong sa Aleosan District Hospital ang suspek, samtang ginahikutar naman ang kaso nga homecide nga ipasaka sa iya.
