Ginplastar sang isa ka guidance counselor nga ang estilo sang isa ka pagka-amay nagabag-o man sa pagligad sang panahon.
Sa interview sang Bombo Radyo kay Francis Ray Subong, isa ka Registered Guidance Counselor, iya ginpahayag nga bangud sa pagbag-o nga nagakatabo subong madamo na sang butang ang kinahanglan nga i-adjust.
Lakip na diri ang pagbag-o sa moderno nga pamaagi sa pag-giya sang isa ka amay sa iya anak nga kinahanglan mangin bukas ini kag konektado sa ila nga mga kabataan.
Suno pa kay Subong, bilang isa ka amay sa subong nga panahon kinahanglan man nga mangin maayo nga halimbawa ini sa pagpadako sang ila kabataan.
Importante man suno kay Subong ang pag-respeto kag pagahatag sang pagsalig sa ila kabataan nga obrahon sini ang butang nga makapamaayo sa iya.
Dugang pa ni Subong, importante man ang maayo nga komunikasyon sa tunga sang amay kag bata sini bangud nagahatag ini sang klaro nga pagtugyan sang isa ka amay nga kun ano man ang natun-an nga kaayughan sang bata sa iya nga amay, dal-on sini sa iya nga pagdako kag sa iya nga kabuhi.
