𝗨𝗡𝗜𝗧𝗘𝗗 𝗞𝗜𝗡𝗚𝗗𝗢𝗠 — Nakakita ka na bala sang ido nga anom ka bilog ang tiil, may duha ka vulva kag isa lang ka kidney?
Makatingalahan man nga pamatian, apang may yara ini sa United Kingdom.
Masubo man, apang, ang ini nga ido ang gin-abandona sang iya anay fur parents sa guwa sang isa ka balaligyaan sa Pembrokeshire, United Kingdom.
Ini nga ido amo si Ariel, nga ginhingadlan halin sa Little Mermaid sang Disney.
Onse ka semana pa lang siya sadto nga tion kag gindala sang lokal nga sentro nga Greenacres Rescue sa Haverfordwest, United Kingdom.
Magluwas sa anom ka mga tiil, ang sahi sang ido nga cocker spaniel natawo man nga may duha ka vulva kag isa lang ka kidney.
Ang pinasahi nga si Ariel, ang gin-adoptar ni Ollie Bird, 40-anyos, kag nagapuyo sa Freshwater West.
Sang naangkon ni Bird ang amo nga ido, gin-ako sini nga siya kag ang iya pamilya ang wala makabati sang istorya ni Ariel antes pa man nila gin-adoptar ang ido.
Ginpahayag man ni Bird nga sang nag-abot si Ariel sa ila, amo man nga tion nga ginakasubo sang pamilya ang pagkadula sang ila una nga ido.
Suno kay Bird, may yara sila sang 16-anyos nga ido nga ila nakita 13 ka tuig na ang nagligad nga nagalagaw sa Freshwater West beach, sa ila lokal nga baybayon. Apang, sa masubo nga palad, hinali lang nga napatay ang ido sang isa ka gab-i.
Sa sulod sang 48 ka oras matapos nga nagtaliwan ang ido, abi nila indi na sila makakuha sang isa pa ka ido bangod makatulublag gid ini.
Narealisar man sang ila nga pamilya nga ang ila puluy-an daw kaangay nga wala sang unod kon wala sang ido, rason nga nag-aplay sila sa Greenacres para makaangkon sang bag-o nga ido.
Dayon nakig-angot liwat ang Greenacres sa pamilya kag ginpakilala sa ila ang ido nga si Ariel.
Apisar nga si Ariel ang may anom ka tiil, may duha ka vulva kag isa ka kidney, ginkalipay gid sang pamilya ang pag-abot sang pinasahi nga ido.
Sugod sang yara na si Ariel sa ila, masami ini nga nagaupod bisan diin sila magkadto kag ang ido ang makalakat gid sang maayo.
Ginlaragway man ni Bird nga nagalangoy man si Ariel sa dagat, naga-paddle board, naga-surf, kag mahagop nga naga-upod sa mga kabataan.
Matapos nga naglapta kag mabatian sang mga tawo ang istorya ni Ariel, kapin 15,000 pound ukon masobra P1.1 million ang natipon sang pamilya bilang mga donasyon para kay Ariel.
Dako naman ang pagpasalamat sang bag-o nga fur parents ni Ariel sa pagbaha sang suporta kag bulig sa ila.
Kapin 20,000 man ka tawag ang ila nabaton halin sa nagkalain-lain nga sponsors agud nga maipaidalum sa operasyon si Ariel kag mangin isa na ka normal nga ido.
Matapos nga nagbubo ang donasyon, natigayon nga ma-operahan si Ariel kag nakuha ang duha ka mga sobra sini nga tiil.
Luyag naman ni Mr Bird nga ipabatyag sa ido nga ang pag-abandona sa iya ang indi isa ka katapusan para kay Ariel, bangud para sa tanan nga nakakilala sa ido, isa ini ka malipayon nga umpisa agud mas madamo pa nga mabuligan nga mga ido sa kalibutan.
