Patay ang isa ka Ilongga overseas Filipino worker nga manugbalik na kuntani sa Hong Kong matapos ini ginluthang sang iya mismo kaugalingon nga live-in partner sa Barangay Salvacion Habog-habog, Molo, Iloilo City.
Ang biktima amo si Laarni, 38, residente sang Lemery, Iloilo; samtang ang suspek amo si Iron Macalalag, 38, residente sang distrito sang Molo.
Sa interview sang Bombo Radyo kay Police Staff Sergeant Mark John Suganob, imbestigador sang Molo Police Station, iya ginpahayag nga nakaangkon sang duha ka samad ang biktima sa iya nga agtang nga rason nga gindeklarar gid nga dead on arrival sa ospital.
Ginapahayag nga hubog ang suspek, nagpanginit sang ginsaway sang biktima bangud sa pagpa-uyat sang armas sa menor-de-edad nga anak, kag sang ulihi, nagluntad na ang krimen.
Gilayon nga nagpalagyo ang suspek kaupod ang duha sini ka kabataan sa una niya nga live-in-partner.
Nahibaluan nga ang biktima ang may yara man sang tatlo ka kabataan sa iya nauna man nga partner.
Sa inisyal nga impormasyon, antes pa man nagluntad ang insidente, masami nga gina-reklamo ang suspek sa ila barangay bangud nagamaoy ini kun mahubog.
At-large ini gihapon kag padayon ang operasyon sang pulis para mapasabat ini sa nahimo nga krimen. #
