Nalakip ang isa ka Ilonggo nurse sa mga healthcare professionals nga ginkilala sa prestihiyoso nga America’s Best in Medicine.
Ini amo si Alfrediriche Viray, tumandok sang Alalasan, La Puz, Iloilo City kag subong Emergency Room Charge Nurse kag Acute Gerontology Nurse Practitioner sa Arizona, Estados Unidos sang America.
Sa interview sang Bombo Radyo kay Viray, ginpakigbahin sini nga madamo sang mga pagtilaw kag pagpanghangkat ini nga naagyan sa kabuhi, apang wala ini nag-upang agud malab-ot ang iya mga ginahandom.
Ginsaysay sini nga apisar tuman ka pigado ang ila sitwasyon sang una kag napilitan pa ini nga mag-untat sa pag-eskwela kasunod man sang kamatayon sang iya amay, wala nadula sa iya ang handom nga mangin maayo ang ila pangabuhi.
Suno sa iya, nagdesisyon ini nga magbalik sa eskwela sa kolehiyo kag natapos ang kurso nga Nursing nga amo ang nangin panugod sang paglab-ot niya sang ginalagas nga kadalag-an sa kabuhi.
Suno pa sa iya, ang iya maduagon nga career subong sa Estados Unidos nga nag-umpisa sa Pilipinas ang pamatuod nga bisan diin man dal-on sang kapalaran, ang kapisan, abilidad, kag pagpalangga sa trabaho sang isa ka Ilonggo ang indi matupungan.
