ILOILO – Ginpa-Bombo sang isa ka iloy ang Ramon Duremdes District Hospital sa Dumangas, Iloilo matapos wala gin-akomodar ang iya anak nga ginapahayag nagakinahanglan sang atensyon medical.
Sa exclusive interview sang Bombo Radyo kay Arlyn Dequilla, iya ginpahayag nga sang Sabado, Marso 6 sang gab-i, nagsululuka ang iya isa ka tuig kag anom ka bulan nga anak, rason nga gilayon niya ini nga gindala sa nasambit nga ospital.
Apang suno kay Dequilla, pag-abot niya sa ospital, wala siya ginpasulod kag gin-abisuhan sang attending nurse nga indi pwede ma-admit ang iya anak bangud may yara sang pasyente nga napatay sa ospital sa COVID-19.
Suno kay Dequilla, naghingyo na lamang siya sa ospital nga bisan sa gwa na lamang sila sang iya anak basta hatagan lang ini sang dextrose.
Ginpapirma man siya sang waiver sang ospital sa diin hatagan sang dextrose ang iya nga anak apang wala sila sang salabton kun ano ang matabo sa pasyente.
Ginpahayag ni Dequilla nga makaligad ang isa ka oras, wala sa gihapon mahatagan sang dextrose ukon first aid ang iya anak.
Bangud sini suno kay Dequilla, nagdesisyon na lamang siya nga isaylo ang iya anak sa Don Jose S. Monfort Medical Center Extension Hospital sa Barotac Nuevo, Iloilo.
Apang suno sa iloy, samtang ginabulong ang iya anak, ginbawian ini sang kabuhi.
Gin-ako sang iloy nga naglain ang iya buot sa Ramon Duremdes District Hospital bangud kun nahatagan lang sang dextrose ukon first aid ang iya anak, posible nga wala ini mapatay.
Nakahanda na man ang pamilya Dequilla nga magpasaka sang kaso batok sa nasambit nga ospital.
Samtang, gilayon naman nga nagsabat ang Iloilo Provincial Government tuhoy sa nasambit nga reklamo.
Sa interview sang Bombo Radyo kay Dr. Cynthia Cabangal Ng, pinuno sang Hospital Management Office sang Iloilo Provincial Government, iya ginpahayag nga mas maayo nga usisaon anay ang bahin sang Ramon Duremdes District Hospital.
Nagakadapat suno kay Ng, nga mag-agi sa patas kag insakto nga proseso ang tanan agud mahatagan sang kasolbaran ang reklamo.
Nagpangabay man si Dr. Ng kay Dequilla nga magpasa sang formal complaint sa Hospital Management Office.
Nagpasalig man ang natungdan nga kun may kapaltahan ang isa ka district hospital, nakahanda nga atubangon sang mga natungdan nga personnel ang ila kapaslawan.
Dugang pa sang natungdan, hulaton sang ila talatapan ang pormal nga reklamo sang pamilya Dequilla agud makahimo sila sang nagakaigo nga tikang natuhoy sa reklamo.
