Naubos sunog kag wala gid sang may nasalbar ang isa ka iloy sa mga gamit nga gin-amat-amat bakal sini sa iya duwa ka bulan nga bata.
Ini kasunod sang natabo nga sunog sa Benedicto, Jaro kahapon.
Sa interview sang Bombo Radyo kay Mary Joy Lopez, iya ginpahayag nga nalakip man sa nasunog ang gintingob sini bakal nga mga diapers, wipes, duha ka kilo nga gatas, kag iban pa nga kagamitan sang ila bata nga suno pa sa iya ila gid kuntani ginsuptan sang iya partner.
Suno pa sa iya naubos man dala sa sunog ang ginbakal nila nga mga gamit para sa bunyag sang ila bata sa Abril kaangay sang mga souvenir para sa mga maninoy kag maninay.
Sa pihak sang natabo, nagapasalamat sa gihapon ang pamilya sini nga wala sang may nasamaran ila pamilya bangud sa insidente.
Sa karon nagatinir sila sa evacuation center kag suno pa sa iya nga padayon sila nga ginahatagan sang bulig sang City Government.
Nagapasalamat man ini sa City Social Welfare and Development Office (CSWDO), nga naghatag sa ila sang bulig kaangay sang folding beds, foam, tubig, pagkaon, kag ila mga bayo agud temporaryo nila nga magamit samtang nagapabilin ang mga ini sa evacuation center.
