Nagalibog bala ang imo ulo bangud gusto mo na mag-date kag magpangita sa imo soulmate apang daw indi mo gid mabayaan ang nagatambak mo nga trabaho?
Siling sang iban, dapat nga tun-an mo gid ang healthy work-life balance para nga kahibalo ka sang imo himuon sa mga amo sini nga sitwasyon.
Sa isa ka kumpaniya sa Thailand, ang management na mismo ang nagatanyag sang paagi agud nga maka-date ang ila ginatos ka empleyado… apang siyempre, sa responsable nga paagi.
Madamo gid ang interesado bangud sa pinasahi nga benepisyo nga gin-offer nga amo ang “paid date leave.”
Partikular ini nga ginatawag nga “paid Tinder leave” nga isa ka unique benefit sa idalom sang Whiteline Group nga isa ka marketing agency sa Thailand.
Daw kaangay man ini sa sick leave ukon vacation leave, kag ang employee nga gusto mag-avail sini ang dapat nga maghatag man sang one-week advance notice para nga indi man mabutang sa alang-alang ang trabaho.
Wala ginhinambit sa reports kun tubtub pila ka adlaw ang pwede gamiton apang limitado lamang halin Hulyo tubtub Disyembre 2024 ang benepisyo nga ini.
Suno sa kumpaniya, ang ila mayor nga tuyo amo nga i-boost ang well-being sang ila 200 ka mga empleyado.
Magluwas sa paid date leave, may yara man sila sang paid Tinder Platinum kag Tinder Gold subscriptions sa sulod sang anum ka bulan para sa mga gusto mag-avail.
Nahibaluan man nga santo sa reports sang The Straits Times, may kaangay man nga benepisyo nga ginahatag ang influencer marketing agency nga Gushcloud International.
May one-day Tinder leave man ini para sa 300 employees sa mga offices sini sa Indonesia, Malaysia, Pilipinas, Singapore, South Korea, kag Thailand.
Paathag sang management, paagi man nila sa pagtatap sa ila empleyado amo ang pag-ulikid sa ila nga healthy social life partikular ang ila relationship goals — pagpakigkita man ini sa iban nga mga tawo, pagpakig-abyan, ukon pagpangita sang life partner.#
