ILOILO – Patay ang isa ka lalaki matapos ginbuno sang iya nga tiyo sa Barangay Magkapay, Leon, Iloilo.
Ang biktima amo si Freddy Capricio, 23, isa ka mangunguma samtang ang suspek naman amo si Clemente Capricio, 56 kag lunsay mga residente sang nasambit nga lugar.
Sa exclusive interview sang Bombo Radyo Kay Pol. Lt. Samuel Gasataya, hepe sang Leon Municipal Police Station, iya ginpahayag nga pagbinaisay ang rason sang pagbuno.
Suno kay Gasataya, yara sa impluwensya sang makahulubog nga ilimnon ang magtiyo kag wala nag-intindihanay.
Pahayag sang natungdan nga kapin 10 ka pulgada ang kalabaon sang kutsilyo nga gingamit sa pagbuno sang suspek sa diin patal ang igo sang sini sa biktima sa wala nga dughan.
Sa subong, yara na sa kustodiya sang Leon Municipal Police Station ang suspek.
